Johnson & Johnson-in Covid-19 vaccine enchhinna titawp lailawk

US-a Medical device company, Johnson & Johnson chuan Thawhṭanni khan Covid-19 vaccine enchhinna an neih mek chu tihtawp lailawk a nih thu a puang a, hei hi enchhinna an neiha volunteer zinga dam lo a awm vang a ni. 

September 23 khan Johnson & Johnson chuan Covid-19 vaccine enchhinna a nei ṭan a, he vaccine dose khat hian Covid-19 hri hi a hneh thei reng dawn em tih a zir a ni. 

Clinical trial hi US, South Africa, Argentina, Brazil, Chile, Colombia, Mexico leh Peru-a volunteer 60,000 teah neih a ni.

Johnson & Johnson hian vaccine final stage enchhinna an neih mek laiin volunteer zingah  dam lo an awm a, eng vanga dam lo nge a ni tih zirchian leh phawt an tum a ni. Hei vang hian vaccine an enchhinna chu titawp rihin, Covid-19 hri hi hriat chian zual zel an tum tih company lam chuan a tarlang.

Thawhṭanni khan World Health Organization (WHO) director-general Dr Tedros Adhanom Ghebreyesus chuan Covid-19 vaccine chu khawvelin a mamawh em em thu a sawi a, he vaccine kaltlang hian mi tam tak nunna chhanhim tum a nih thu pawh a sawi bawk. 

World Health Organization hnuaia vaccine enchhin mek Covax chu a him tawk em tih hriat chian a nih hma loh chuan hman rih a nih dawn loh thu sawiin, dawhthei taka vaccine nghah hi a ngai rih a ni, a ti.