Hezbollah-in drone leh rocket hmangin Israel sipaite kap Israel-in Hezbollah beihna chhan let ngei a tiam

Lebanon-a Iran thlawp helpawl, Hezbollah chuan Ningani khan rocket leh drone eng emaw zat hmangin Israel sipaite an kap tih an sawi. Hei hi Israel nena indo mek, Palestinian firfiak pawl Hamas an thlawpna an lantir hnua ṭum khata Israel an beih nasat ber ṭum a ni.

Hezbollah fighter-te chuan ramri hrula Israel sipai barrack leh hmun paruk chu rocket leh drone hmang hian a kap tih an sawi a, an hmun beih zinga pakhat chu Israel sipaiten intelligence headquaters atana an hman a ni, an ti. Israel sipaite laka beihpui an thlak hi Thawhlehnia Hezbollah commander Taleb Abdallah thah a nih vanga an chhan letna a nih thu an sawi bawk.

Israel army pawhin Hezbollah hian Galilee leh Goland Height area lam chu projectile 40 vela an kah thu leh, a tam zawk erawh an lo kah thlak thu an sawi. Manara border village bula an kahnaah, Israel Defence Force (IDF) sipai pakhatin hliam na tak a tuar a, hliam na vak lo tuar sipai dang pakhat a awm bawk a ni.

Israel sorkar chuan Hezbollah-te beihna chu na taka chhan let a tiam. Sorkar thupuangtu, David Mencer chuan chanchin thar lakhawmtute a kawmnaah, Israel chuan Hezbollah pawikhawihna hi a chhang let ngei dawn a, inbiakna hmang emaw, thil dang hmang emaw pawhin hmar lam ramria Israel himna hi a siamṭha ngei dawn a ni, a ti.