Gaza-ah chhawmdawlna a luh theih nan Israel-8 in chhun lamah indo chawlhsan dawn

Israel sipai chuan Gaza Strip chhim lam an beihna chu an chawl lailawk ṭhin dawn tih nimin khan an puang. He 'tactical pause' tia an vuah, indo tihtawp lailawk an tum chhan hi Gaza Strip-ah chhawmdawlna ṭha taka a luh theih nan a ni tih Israel sipaite chuan an sawi.

Israel sipai chuan Rafah leh a chhehvelah indo chu anmahni huna zing dar 8 aṭanga zan dar 7 inkar tihtawp tum a ni tih an sawi a, hetiang hian thu leh awm hma zawng chu nitin indo hi tihtawp ṭhin a ni ang, an ti. Hemi hun chhung hian Israel-in a thunun, Kerem Shalom crossing aṭangin chhawmdawlna phurh luh a ni ṭhin anga, Salah a-Din highway lam panin Gaza hmun tam zawkah chhawmdawlna bungruate hi sem chhuah ṭhin tura ruahman a ni. Israel chuan hetianga an tih chhan chu UN leh chhawmdawltu pawl dangte nen an inremsiamna a ni tih an tarlang bawk. Indo chawlh an neih laia chhawmdawlna phurtute kalna tur kawng map pawh an tarlang bawk a ni.

Khawvel ram dangte chuan Gaza a chhawmdawlna tam zawk phurh luh phalsak turin Israel hi an nawr fo ṭhin a, UN humanitarian office-in a tarlan danin May 6 aṭanga June 6 inkar khan nikhatah nitin mamawh phur truck 68 chu UN chuan an dawngsawng ṭhin tih an tarlang. Hei hi April thlaa nitin truck 168 chhawmdawlna phur lut ṭhin aṭangin a tlahniam hle a ni. Israel in chhawmdawlna luh theih nana hma an lak tak avang hian Gaza Strip-ah hian bungraw lut a tam phah beisei a ni.

Israel sipai pariat in nunna an chan

Israel sipai pariat-in Gaza chhim lamah nunna an chan belh leh tih Inrinni khan Israel sipai chuan an puang. Israel sipaite chuan Gaza chhim lam an nawr mek a, Rafah leh a chhehvel an kahnaah Palestinian 19 an thi tih an puang tel bawk.

Israel sipai boralte hi combat engineering unit-a mi vek niin, Palestinian firfiakte nena an inbeih laiin an motor puak vangin an thi a ni. He thil hi Tel al-Sultan bulhnaia thil thleng niin Inrinni zingkara thleng a ni. Sipai thupuangtu, rear admiral Daniel Hagari chuan puak thei thil an lo kam vang emaw, anti-tank missile aṭanga an kah vang emaw nia a lan thu a sawi. Gaza Strip-a Hamas nena an indona vanga Israel sipai nunna chan zat hian 300 a pel tawh a ni.

Hetih lai hian Israel sipaiten chhun lamah indo chawlh, tactical pause an neih tur thu an puan hnuah nimin zing aṭanga chawhnu lam thleng kha chuan inkap thawm hriat tur a awm ta rih lo nia sawi a ni.