China-in South China Sea-ah ramdang mi man theihna dan siam

China chuan a ram china a chhal, South China Sea huam chhunga dan a zam thar chu Inrinni khan a tichhuak a, he dan hnuaiah hian Chinese coast guard-te chu South China Sea-ah thuneihna sang zawk pek an ni.

Dan thar hnuaiah hian Chinese coast guard-te chuan South China Sea-a dan loa lut, ramdang mite chu an man thei dawn a ni. Dan thar hian mi mante chu a case a zirin ni 60 thleng hren a phalsak a, China tuipui huam chhunga ramdang lawng lutte pawh he dan hian a huamtel dawn a ni. South China tuipui chhunga ramdang nena an inchuh hmuna ramdang mi lutte pawh a huam tel dawn a, tuipui ramri buai lai pawh he dan hian a huam tel avangin China ṭhenawm ramte chuan an sawisel nghal a ni.

China chuan South China tuipui zawng zawng deuhthaw hi a ram chin angah chhalin he tuipui kama ram dang awm Philippinnes, Indonesia, Vietnam leh ASEAN ram dangte nen tuipui ram chin inchuhin buaina an neih phah fo a ni. Tuna dan a zam thar a tihchhuah hi South China tuipuia China ṭhenawm ramte bakah G7 chuan an sawisel a, China chu a chakna leh thiltihtheihna hmachhuanah an puh.