Ukraine peace summit-ah Putin inkahhai rawtna pawm lo

Ukraine indona tihtawp a nih theih nan Switzerland-ah ni hnih awh Ukraine peace summit neih niin, he summit-ah hian Russia president Vladimir Putin-a'n inkahhai puan a nih theih nana rawtna a thlente chu Italy leh German chuan an duh lo.

Putin chuan inkahhai puang tura inbiakna an nei dawn a nih chuan, Russia-in a ram lak anga a chhal aṭangin Ukraine chuan a sipaite a hnuhkir a ngai tih a sawi a ni. Heng hmunte hi Russia tarlan danin Donetsk, Luhansk, Kherson leh Zaporizhzhia te an ni. Hemi bakah hian Ukraine-in NATO zawm an tumna pawh bansan turin Russia chuan a duh tih a sawi bawk. Russia thil phut hi Ukraine in a pawm thei a nih chuan inkahhai puang turin inbiakna an nei theih nghal dawn niin Putin chuan a sawi.

Italy prime minister Giorgia Meloni chuan Russia President rawtna thlen chu thil awmze nei lo a ni tiin, Ukraine chu anmahni ram aṭangin an inhnukdawk dawn tihna a ni, a ti. Germany chancellor Olaf Scholz pawhin Russia chu inluling taka inremna neih tumah a puh bawk. Switzerland-a summit neihah hian ram 90 chuang leh khawvel pawl lian hrang hrang an tel a, Ukraine indona tihtawp an nih theih dan tur sawihona an nei a ni.