Israel PM Netanyahu-a'n war cabinet a ṭhiat

Israel prime minister Benjamin Netanyahu chuan member paruk awmna war cabinet a ṭhiat. War cabinet hi nikum October thlaa Gaza Strip-a Hamas nena an indo hnu an din niin, member-te hi portfolio hran erawh pek an ni lo thung.

War cabinet-ah hian Prime Minister, defence minister Yoav Gallant leh strategic affairs minister Ron Dermer te an tel a, anni bakah indo hnua ṭangrual sorkar zawmtu Israel Resilience Party hruaitu Benny Gantz leh Gadi Eisenkot bakah religious party Shas hotu Aryeh Deri te chu observer angin an awm bawk. Mahse Gantz hian Hamas nena indona a zawh hnua Gaza Strip a roreltu tur chungchanga ruahmana a siamte puang turin PM Netanyahu hi a phut a, a hun tiam chhunga ruahmanna a siam a puan loh avangin war cabinet member a nihna aṭanga bangin, a rual hian Eisenkot pawh a bang ve nghal a, ṭangrual sorkar an thlawpna pawh an hnukdawk zui bawk.

War cabinet aṭanga Gantz a ban hnuah, Netanyahu kaihhruai far-right sorkara tel party dangte chuan war cabinet hi siamṭha turin an nawr zui nasa hle a, finance minister Bezalel Smotrich leh national security minister Ben Gvir te ngei pawhin telh turin an phut a ni. Mahse Netanyahu chuan war cabinet member turte hi ruat ṭha loin a ṭhiat ta zawk a, Gaza Strip-a indona chungchang pawh member tlem zawkin, Defence Minister leh Strategic Affairs Minister-te nen an ngaihtuah ho tawh zawk dawn niin a lang.

Indo chawlh chungchangah cabinet member-te inlungrual lo

Israel sipaiten Gaza Strip-a chhawmdawlna thawn luh a nih theih nan khaw en lai, zing dar 8 aṭanga zan dar 7 thleng indo chawlh lailawk, tactical pause an neih ṭhin tur thu a sawi chuan Israel cabinet member zingah inhnialna a chawk chhuak.

Tactical pause neih hi inkahhai a ni lo a, civil mite chhawmdawlna phurh luh a nih theihna turin chhun lamah Israel sipaite hian Gaza an beihna chu an chawl lailawk ṭhin dawn a ni.

Israel minister ṭhenkhat chuan sipaite thutlukna siam hi duh loin na takin an sawisel nghal. National security minister Itamar Ben-Gvir chuan, 'He thutlukna siamtu hi mi sual leh mi â a ni,' a ti. Finance minister Bezalel Smotrich pawhin indonaa an hlawhtlinna tur a tichhe dawn niin a sawi bawk.