Mecca-a biakzinaa kal mi 14 khaw lum vangin an thi

Saudi Arabia-ah khaw lum lutuk vangin biakzinaa kalte chuan harsatna an tawk a, mi 14 in khaw lum vangin nunna an chan tawh a ni. Heng mite bakah hian Iran mi panga chu an ram foreign ministry chuan an thi tih a tarlang ve bawk.

Jordan foreign ministry chuan an ram aṭanga biakzinaa kal mi 14 chu sun stroke vangin an boral tih an puang a, mi 17 an chin hriat loh an awm mek tih an tarlang tel bawk. Iran Red Crescent chief, Pirhossein Koolivand pawhin Iran mi panga chu haj pilgrimage neih a nih mek laiin Mecca leh Medina hmunah an boral tawh tih an sawi a, an thih chhan erawh a sawi lang lo thung.

Saudi Arabia sorkar chuan Muslim hmun thianghlim tlawha zin zinga thi zat hi chiang takin a la tarlang lo thung. Saudi sorkar hian khaw lum laka mipuite ven nan hmun ṭhenkhatah sik leh sa thlak danglam theihna hmun a siam bakah tui intur semin khualzinte chu ni eng laka tawmhim turin thurawn a pe bawk.

Haj hi Muslim sakhaw hun pawimawh tak pakhat niin Muslim sakhaw zuitu tam tak chu an hmun thianghlim, Mecca panin an zin ṭhin a ni. Hemi hun hi khaw lum zual lai niin 40 degree celsius a pelh chang a awm ṭhin avangin khaw lum vanga thi an lo awm fo a ni. Kum 2023 Haj lai khan mi 240 chuang khaw lum vangin an boral a, khaw lumin natna a thlen vangin mi 10,000 chuang an damlo bawk.