Nuclear ralthuam tana sum seng hnem ber US : ICAN

International Campaign to Abolish Nuclear Weapons (ICAN) chuan khawvel ram pakua, nuclear ralthuam nei zingah United States chu nuclear ralthuam tana sum seng hnem ber a ni tih an tarlang.

Nuclear ralthuam nei ram pakuate hian kum 2023 chhung khan nuclear ralthuam atana an sum sen belhkhawm chu USD tld 91.4 a ni a, second tin USD 2,898 seng ang zel an ni. Heng ram zingah hian US chu sum seng hnem ber niin USD tld 51.5 chuang zet an seng a, hei hi ram dang zawng zawng sum sen belhkhawm ai pawhin a tam zawk a ni. China chu pahnihna niin USD tld 11.8 an seng a, USD tld 8.3 hmangtu Russia chu pathumnaah a awm bawk.

Stockholm International Peace Research Institute (SIPRI) chuan thuchhuah dangah nuclear ralthuama intlansiakna chuan zual lam a pan mek tih an tarlang ve bawk. SIPRI chuan hriat theih chinah khawvel pumah nuclear warhead hman mai theih 2,100 a awm tih tarlangin, heng zinga a tam zawk chu US emaw Russia emaw ta niin a sawi. SIPRI director Dan Smith chuan ,"Vanduaithlak takin kumtin nuclear warhead hman theih hi a pung zel a ni" a ti.

Khawvela nuclear ralthuam awm zawng zawng zinga 90% chu US emaw Russia emaw ta a ni tih SIPRI chuan an tarlang bawk. Asia ram pathum- India, Pakistan leh North Korea te chuan ballistic missile hmanga nuclear kap chhuak thei turin hma an la mek a, United States, Russia, France, UK leh China erawhin an ti thei tawh thung.