Kenya-in refugee camp lian ber a khar dawn

Khawvela refugee camp lian ber, Daddab camp, Kenya rama mi chu November thlaah khar a ni dawn tih Kenya Interior Minister Joseph NKaisserry chuan a sawi.

Dadaab camp-ah hian Somalia aṭanga raltlan mi nuai thum chuang an awm a ni. Minister chuan camp-a awmte sawnchhuahna tur hian dollar mtakduai 10 ruahman a ni tih a sawi. Hemi atan hian UN leh Somalia sorkar nen an thawkho dawn a ni.

Somalia tualchhung indona thleng avanga raltlante awmna turin kum 1991 khan Dadaab camp hi siam a ni a, ṭhenkhat chu camp-ah hian kum 20 chuang an khawsa tawh a ni.

NKaisserry chuan camp hi November thla tawpah khar fel tum a nih thu a sawi a, khar an tum chhan hi security lam thil vang a ni tiin, he camp aṭang hian an ram beihna tur ruahmanna a awm a ni, a ti.

UN leh charity lam chuan camp khar tur hi ṭha an ti lo tih an sawi a, rights group-te chuan tihluihna hmanga raltlante sawnchhuah an ni tur hi international law kalh a ni, an ti.

Camp khar tum a nih thu hi May thla tir lam khan sorkar chuan a lo puang tawh a, Nkaiserry chuan he camp hi Somalia helpawl, Al-Shabab-ten an hmang ṭangkai tih sawiin, kum 2015 April thlaa helhoin Garissa University College an beiha, zirlai leh staff 148 an thihna pawh kha he camp aṭanga ruahman vek hi niin a sawi.