IS-in TV set tichhe turin Muslim-te a fuih

Islamic State (IS) firfiak pawl chuan Muslim-te chu an rinna hruaikawi leh an nun dan tichhe thei channel chhuak ṭhin venna atan an satellite TV set tichhe turin a fuih.

IS hian video hi an official Telegram accout aṭangin an tichhuak a, "Islam hmelmate chuan media hmangin kan lakah indo an puang mek a, hei hi sipaite aia a hlauhawm loh bikna a awm lo a ni" a ti. Video-ah hian mi ṭhenkhatin an satellite dish an tichhe laite an tilang tel bawk.

Hetihlai hian Iraq sipaite chuan IS kut aṭanga Fallujah khua laklet tumin beihpui an thlak chhunzawm zel. Sipaite hian hma sawn zelin khaw daiah an lut tawh a ni. Chhawmdawl hna thawktute chuan Falluja khawchhungah hian civil mi 50,000 vel an tangkhang mek tih an sawi a, mi 3,000 vel chu an tlanchhuak thei a ni. Midang tlanchhuak hman ve lo te hi firfiakte hian khua an chhuahsan an phal loh avangin an dinhmun a ṭha tawh lo hle a ni.

Fallujah khuaa civil mite dinhmun hi a chhe tawh hle a, tam tak chu ei tur neiloin an awm a, an zinga ṭhenkhat chu IS tana a thawh duh loh avangin kahhlum an ni bawk. Mipuite chuan an thlawp lo nia an hriat avangin an che rawng hle a, Thawhṭanni pawh khan tlangval 100 rual ve chu manin an kalbopui niin an sawi.

Sipaite hian khawpui dai hi lut tawh mah se, khawchhunga an lut tur dangin firfiakte hian an beilet nasa hle. Operation commander, Lieutenant-General Abdelwahab al-Saadi chuan Naimiyah-a an inbeihnaah firfiak 75 an kaphlum tih a sawi. Security force lam pawh 15 an thi nia sawi a ni bawk.