Syria tan chhawmdawlna thlaksak turin ngen
Syria tualchhung indona thleng avanga chhawmdawl hna thawktuten an kalpawh theih loh khuate tan thlawtheihna hmanga an mamawhte thlaksak turin US, UK leh France te chuan UN hnenah an ngen.
Syria sorkar chu ramdangte nena chhawmdawlna pek dan tur chung≠changa International Syria Support group (ISSG) ten inremna an siam zah tawk lohah an puh bawk.
Nilaini khan Darayya khaw tan chhawmdawlna tlem chauh pek a ni a, khawchhunga motor lutte hian ei tur pawh an phur lo nia sawi a ni.
Vawiin hian thlawhtheihna hmang≠a ei tur thlak dan tur chungchang ngaihtuahin UN Security Council meeting neih a ni ang.
US State Department thupuangtu John Kirby chuan Syria mi sing tel chu englai pawha chhawmdawl ngai an ni tih a sawi. UN food agency, World Food Programme pawhin US hnenah thlawhtheihna hmanga ei tur thlak a nih dan tur hi a hrilhfiah tawh tih a sawi bawk.
British Foreign Secretary Philip Hammond chuan hun tiam chhunga chhawmdawlna thawnluh phal luh zat chu a tlem tham hle tih sawiin, "Thlawhtheihna hmanga ei tur thlak chu a hautakin a hlauhaawm a, mahse tunah chuan thlan tur dang a awm tawh lo a ni" a ti.
US leh UK chuan Syria sorkar thlawptu, Russia leh Iran hnenah him leh tluang taka ei tur thlak a nih theih nan hma lo la turin an ngen bawk.
ISSG hi US leh Russia kaihhruaina hnuaiah awmin, world leh regional power 17 an tel a, an zingah hian Arab League, European Union leh United Nations pawh an tel.
April thla khan UN chuan Syria sorkar sipaiten kum li zet an hualbeh tawh, Darayya khuaa mi 4,000 vel la awmte dinhmun chu a chhe hle niin a sawi. Sipaiten Darayya khua an hual beh lai hian, helte chuan Darayya hmar thlang lama Muadhamiya khua an awp bawk a, he khuaa chengte dinhmun pawh hi a ṭha lo hle.
Darayya khua electric eng pekna hi kum thum kalta aṭang khan tihtawp sak an ni tawh bawk.
UN emergency relief co-ordinator Stephen O'Brien chuan Syria sorkar chuan harsatna tawkte chhawmdawlna tur thawnluh dilna chu vawi tam tak a lo ngaihthah tawh niin a sawi. Thla hmasa pawh khan Darayya khuaa chhawmdawlna purtu motor lut tur chu dan a ni.