Dalai Lama'n raltlante an rama kir leh turin a duh

Tibet sakhaw hotu, Dalai Lama chuan Europe chuan raltlan a la lut hnem lutuk nia a ngaih thu leh, raltlante chu an ram buaina a reh hunah an ram dinhmunte siamṭha tura an mahni ramah kir leh vek tura a duh thu a sawi.

German chanchinbu Frankfurter Allgemeine Zeitung in a kawmnaah he thu hi sawiin, Dalai Lama chuan raltlante tawrhna chu a hriatthiampui leh a tawrhpui thu a sawi. Dinhmun ṭha zawka dingte chuan harsatna tawkte
ṭanpui chu an tih tur a ni tih a sawi a, hetihrual hian Europe-a raltlan lut chu an tam ta lutuk nia a ngaih thu a sawi bawk.

Dalai Lama chuan raltlan tam tak la luttu ramte chuan thil awmdan chu ngun taka an thlir chian a ngai a ni tiin, an rama lut tharte zawng zawnga chuan an nundan leh kalphungte chu an zawm ve vek thei dawn lo tih an hriat a ngai a ni, a ti. Hei vang hian Europe ram hruaitute chuan an rama lutte lo enkawl dan an hriatthiam a, awm lailawkna tur an lo siamsak a ngai a ni, a ti.

"Germany ram hi Arab ram a ni thei dawn lo a, Germany chu Germany a ni reng dawn. Hei vang hian harsatna tam tak a awm thei dawn a ni" tiin Dalai Lama chuan a sawi.

Kum 2015 aṭang khan Europe rama pem lut hi an pung nasa a, raltlan tam tak lo pawmtu Germany leh Austria ramte chu a fak rual≠in, Dalai Lama chuan ram hrang hrang chuan mi tam tak chu nuamsa takin an siam thei dawn lo a ni, a ti.