Sakei note thi hmuhna temple thubuai siamsak dawn

Thailand-a wildlife thuneitute chuan sakei note thi ruang 40 zet hmuhna, Wat Pha Luang Ta Bua temple, Tiger Tempe tia sawi ṭhin chu thubuai siamsak a ni dawn tih an sawi.

Wildlife thuneitute hian Kanchanaburi province-a tourist site, Tiger Temple-a sakei khawite sawnchhuak tura an hmalaknaah temple choka freezer-ah sakei note thite ruang chu Nilaini khan an hmuchhuak a ni. Ramsa dang ruang pawh hmuh a ni bawk.

Police Col Bandith Meungsukhum chuan sakei note te chu ni khat emaw, ni hnih emaw leka upa nia an lan thu a sawi a, mahse eng huna thi nge tih erawh hriat a ni lo tih a sawi. Temple-a sakei khawite nen inzawmna an nei em tih enfiah turin DNA test neih a ni dawn tih a sawi.

National parks official Adisorn Noochdumrong chuan temple operator-te chu sumdawnna atana ramsa hmang a, ramsa chunga rawng taka che leh dan loa ramsa ruang kawlah puhna thubuai siamsak an ni dawn tih a sawi.

Hetihlai hian temple thuneitute chuan an puhna chu thu dik lo a nih thu sawiin, kum 2010 khan sakei no thi te an halral ṭhin chu an titawp niin an sawi. Sakei note thi ruang an dahna freezer hi sakei chaw an dahna ṭhin a ni a, savawm ruang pawh hmuh tel a ni.

Tiger Temple-ah hian sakei 137 zet an awm a, heng sakeite hi khualzinte hipna atan hmangin, temple tlawhtu khualzinte chuan thla an lakpui ṭhin a, an lun phah thei hle a ni. Mahse Department of National Parks, Wildlife and Plant Conservation chuan temple hian sakei khawi phalna hi a nei niin a sawi. Sumdawnna atana hmanga puh an nih avangin sawnchhuah tumin hma an la a ni.