France ramah tuilian vangin emergency puang

France ramah ruahsur nasa avangin tui a lian a, tuilenna bial chhungah President Francois Hollande chuan emergency a puang. Tuilian tuarte ṭanpui an nih tur thu a sawi bawk.

Ruah sur nasa vang hian Loire leh Seine lui tuite chu an lian a, he tuilian hi Paris khawpui leh a chhehvel bialten an tuar a ni. Nilaini khan Paris chhim lama Longjumeau khuaah tuilian vang hian pitar pakhat a thi a, khawchhunga chengte chu hmun him lamah hruaichhuah an ni.

Prime Minister Manuel Valls chuan tuilian tuartu, Paris chhim lam km 75 vela hlaa awm, Nemours khua a tlawh. He khuaa cheng mi 13,000 zinga 3,000 chu hmun him lamah sawnchhuah an ni tawh. Khawchhunga tuilian hian in chhawng hnihna thlengtein a chim pha a, PM chuan khawchhung dinhmun chu a ṭha lo tih a sawi.

Paris khawpuiah pawh tuilian vang hian Eiffel Tower leh Notre-Dame Cathedral panna leihnuai kawngte pawh khar rih a ni.

Louvre museum hotu Jean-Luc Martinez chuan museum pawh khar rih a ni dawn tih a sawi. Loire valley-a Unesco heritage site, Chambord caste pawh tui hian a chim nasa hle. Tuilian avanga kawng laka motor-a tangkangte
ṭanpui tur hian sipai puihna dil a ni. Loiret bial hian kum 100 chhung tuilian nasa ber a tuar mek a ni.