US House Speaker-in Trump a thlawp dawn

US House Speaker Paul Ryan chuan November thlaa US President thlanna neih turah Republican candidate, Donald Trump chu a vote dawn tih a sawi.

Republican president candidate inchuh laiin party hruaitu zingah Donald Trump duh lotu hi eng emaw zat an awm a, mahse an party candidate tura a tlin chian tak hnuah an ngaihdante an thlak leh ṭan a ni. US House Speaker Paul Ryan pawh hian hian Trump hi a thlawp theih loh thu a lo sawi tawh a, mahse thuthar a neih lehah chuan kawng tam takah duhdan in ang an nei tih sawiin, President thlan hunah pawh a vote tur thu a sawi ta a ni.

Ryan chuan a twitter-ah he thu hi sawichhuakin, Donald Trump chuan Republican party agenda-te chu a tihhlawhtlin ngei a rin thu sawiin, a vote dawn tih a sawi a ni. Hemi hnua chanchinbuin an kawmnaah pawh Trump nen hian kawng ṭhenkhatah ngaihdan in ang lo an nei tih chu a zep loh thu a sawi bawk.

Paul Ryan hi Republican elected official zinga senior ber a ni a, Trump a thlawp tur thu a sawi hian party member zingah pawh nghawng a neih phah rin a ni. Hetihlai hian party hruaitu langsar ṭhenkhat chuan Trump hi an la thlawp duh lo a, an zingah hian President hlui George HW Bush leh George W Bush te an tel.

Democtratic party lamah president candidate tur hi la chiang lo mah se, Hillary Clinton chu a tling ngei rin a ni. Clinton leh Trump-te hi ṭawngkamin an inbei na sawt hle. Ningani khan Clinton hian Trump hi na taka sawisel lehin, a foreign policy chu US tana thil hlauhawm tak a ni a, President luah turin a tlak lo a ni, a ti.

Clinton-i chuan, "Hriatna zau, rilru nghet leh mawhphurhna sang tak mamawhna office luah tur hian a rilru put hmang aṭang ringawt pawhin a tlak lo a ni" tiin Trump chungchang a sawi. Trump chu an ram hruaitu lu ber ni a, nuclear code kawl tlaka a ngaih loh thu a sawi.

November 8 hian US President hi thlan a ni dawn a, party pahnihte hian July thlaa convention an neihah official-in an party candidate hi an puang ang.