Putin-a'n khawthlang ramten NKorea an hrekna a dodal dawn

Russia president Vladimir Putin chu ni hnih cham turin North Korea-ah a zin a, nimin khan NKorea hi thlengin vawiin tlai lamah Vietnam lam a pan leh ang. Putin hian NKorea hi kum 24 hnua a tlawh leh vawi khatna a ni.

Russia president hian nimin khan Pyongyang thlengin, thuthar thehdarhtute nen an inkawm a, hetah hian khawthlang ramten Russia leh North Korea laka hrekna hrang hrang an siam chu an do let dawn tih a sawi. Putin hian a cham chhungin NKorea nena an inlaichinna atana pawimawh hrang hrangte Kim Jong Un nen an sawidun dawn a, thawhdunna nghet lehzual an neih theih ngei beisei a ni.

Putin hian NKorea nen khawthlang ramte tihbuai loh tur insumdawntawnna leh security system neih a duh tih a lo sawi tawh a, Ukraine nena an indonaah pawh NKorea chuan a thlawp avangin lawmthu a hrilh bawk. President hi Russia defence minister Andrei Belousov, foreign minister Sergei Lavrov leh deputy prime minister Alexander Novak te chuan an ṭawiawm a ni.

North Korea hotupa, Kim Jong-un chuan September, 2023 khan Russia a lo tlawh tawh bawk a, ram pahnih inkar pawh hi a ṭha chho hle. US State Department thupuangtu Matthew Miller chuan NKorea chu Russia ralthuam pe ṭhinah puhin, ballistic missile tam tak leh a mu 11,000 chuang Ukraine indonaa hman turin NKorea chuan a pe a ni, a ti. US chuan Putin chu a kaw tawpah a ṭang tawh nia an hriat thu sawiin, indonaa hman tur ralthuam dapin Iran leh NKorea lam a hawi tawh a ni, a ti bawk.