Myanmar sipai sorkarin VPN a block

Myanmar-a sipai sorkar chuan internet lam khuahkhirh chho zelin, virtual private networks, VPN a block leh.

Media report chuan sipai sorkar hian May thla tawp lam aṭang khan internet-a free communication block tumin hma a la ṭan tih an lo sawi tawh.

Kum 2021, February 1-a civil sorkar thuneihna an hneh chhuh hnuah sipai sorkar hian internet lam khuahkhirhna tur hian kawng hrang hrangin hma a la chho a ni. Internet hmangtute vaiin, kawtthlera mi kalte pawh an mobile phone-a VPN application-te enfiah sakin, hmuh a nih chuan sum te an chawitir ṭhin nia sawi a ni. Radio Free Asia Burmese language service chuan kar liam ta pawh khan an mobile phone-a VPN apps hmuh an nih avangin security force-ten mi 25 manin pawisa an chawitir tih a sawi.

Sipaite hian armed group hrang hrang aṭangin beih letna an tawk mek a, sipai sorkar dodaltute hi mipuiten an thlawp ṭhin avangin inbeihna thlenna hmunah te mipui inbiakpawhna awmte tihtawp a ni fo ṭhin. Hei vang hian an ram chhunga thil thlen dan dik tak pawh hriat fiah a har phah ṭhin a ni.

Myanmar-a advocacy group, Athan-in report a tih chhuahah, an rama khaw 330 zinga 90 velah chuan internet leh phone service hi thuneituten an tihtawp sak tih an tarlang.

Sipaiten thuneihna an chan hnuah, sipai rorelna dodalna kawngah mipuiten social media, a bikin Facebook an hmang ṭangkai hle a, nawrh huaihawtna tur pawh Facebook kaltlangin an buatsaih ṭhin. Sipaiten mihring dikna chanvo an palzut sak ṭhin do letna atan, Facebook leh social media platform dang pawhin Myanmar sipai member-te chu an platform hman an khapsak bakah, sipai nena inzawmna nei company-te advertisement pawh an block sak ṭhin bawk.