Italy-a lawng chesualah mi 10 an thi

Italy chhim lamah Thawhṭanni khan lawng pahnih an chesual a, mi 11 an thi a, chin hriat lohin mi 64 an awm bawk.

German aid group Resqship chuan Lampedusa thliarkara lawng chestual thu leh, thi zat hi a tarlang a ni. Lawng chesual aṭang hian chhanchhuah hnathawkte chuan mi 51 an chhan chhuak a, an zinga pahnih chu biak theih lohin an awm. Lawng chesuala chuang zinga tam tak chu Syria, Egypt, Pakistan leh Bangladesh aṭanga Italy a pem luh tumte an ni a tih UNICEF, UNHCR leh IMO chuan an tarlang.

Thawhṭanni vek khan Italy chhim lama tuipui kamah lawng chetsualna dang thlengin mi 64 chu Mediterranenan tuipuiah chin hriat lohin an bo mek tih United Nations agencies chuan an tarlang. He lawng chesual hi Turkey aṭanga kal niin, Calabria aṭanga km 200 vela hla tuipuiah a kang niin an sawi. Lawng hi Greece leh Italy tuipuia inrina bawr velah a pil nia hriat a nih vangin ram pahnihte hian mi bo zawn hna hi an kalpui a ni.

Lawng chesual aṭang hian mi 11 chhan chhuah niin an zinga pakhat chu a hnu lawkah a hliam tuar loin a thi tih Italian coast guard chuan an sawi a, midang an chhan chhuahte chu Calabrian port-ah hruai niin enkawlna pek nghal an ni bawk. Lawng chesual aṭanga chhan chhuahte leh bo zawn mekte hi Iran, Syria leh Iraq khua leh tui an ni tih tarlan a ni bawk. International Organization for Migration (IOM) chuan kum 2014 aṭang khan Europe-a pem luh tum mi 23,500 chu Mediterranean tuipuiah hian an thi emaw an bo emaw tawh tih tarlangin, kumin chhungin mi 749 hetiang hian an awm tawh a ni, an ti.