Iraq sipaiten Fallujah khaw chhung an lut

Islamic State (IS) firfiak pawl kut aṭanga Fallujah khua laklet tuma beihpui thlak mektu, Iraq sipaite chuan kar kalta Inrinni khan khawpui chhung an lut a, khawpui chhim lam district hmun ṭhenkhat chu firfiakte kut aṭangin an la kir tawh.

Iraq sipaite hian Fallujah chhim lam vengtu, IS firfiakte chu an hneh hnuah al-Nuaimia district an lut a ni. Shuhadaa leh Jubail district te lak tumin an bei leh nghal a ni.

US kaihhruai ṭangrual ramte chuan Iraq sipaite puiin Shuhadaa district-a IS hmun pawimawhte an lo bomb bawk a, firfiak pakua an thi nia sawi a ni. Fallujah hmarthlang lama Azragiyah biala firfiakte hmun pawh beiin, an motor pali an bomb chhiatsak bakah firfiak 16 an thi bawk a ni.

Iraq sipaite hian an thawhpui, Shiite paramilitary leh Sunni unit-te nen Fallujah hmarthlang lama Saqlawiyah bial chu Inrinni chawhnu lam khan an lut a, he bial chhunga hmun pawimawhte chu firfiakte kut aṭang hian an laksak tawh a ni.

Fallujah khuaah hian firfiakten tlanchhuah an phal loh avangin civil mi 50,000 chuang zet an la tangkhang mek a, sipaite hian civil mi tawrhna thlen an hlauh avangin hma an la chak thei lo niin an sawi.

Joint Military Command thupuangtu, Brigadier General Yahya Rasoul chuan khaw chhungah hian IS firfiak 400-600 vel an awm nia hriat a nih thu leh, an zingah hian ramdang mi tam tak an tel thu a sawi.