Poland sorkar duh lohna lantirin kawng zawh

Poland khawpui, Warsaw-ah chuan kar kalta Inrinni khan sorkar laka lungawilohna lantirin kawngzawh a ni a, mi 50,000 vel an tel.

Kawngzawh hi President hlui pahnihte, Aleksander Kawsniewski leh Bronislaw Komorowski-ten an ho a, right-wing sorkar policy an duh loh thu leh, an zalenna nekchep sak an ni chu an duh loh thu an sawi.

Inrinni-a kawngzawh hi civil movement thar, Committee for the Defence of Democracy, KOD in nikum November thla
aṭanga sorkarna chelhtu, conservative right-wing sorkar laka lungawi lohna a lantir ṭum eng emaw zatna a ni tawh a ni.

Sorkar policy thar hian Poland leh European Union leh United States inlaichinna a tichhiat phah a, hei hian ram mipuite thin a tiur hle. Mahse rorellai party, Law and Justice party chuan an policy kalpui tur hian mipuiten an ring tawk niin an sawi thung.

Kawngzawhnaa tel, president hlui pahnihte chuan kum 1989 inthlana an rama communist rorelna paihthlak a nih thu sawiin, Poland chu an lo din tawh anga ram zalen ni zel tura an duh thu an sawi.

Warsaw khawpui bakah Berlin leh Brussels-ah pawh kawngzawh hi huaihawt a ni bawk. Kawngzawh hian zalenna, intluktlanna leh democracy an duh thu an aupui a ni.