Wuhan-ah mi mtd 10.59 in coronavirus test nei tawh Hri leng vanga thi 1000 an chuang

China rama novel coronavirus hmuhchhuah ṭanna, Hubei pro­vince khawpui Wuhan khuaah chuan mi maktaduai 10.59-te chu hri an kai leh kai loh enfiah an ni tawh a, hei hi he khawpuia mihring cheng zinga 99% an tling. Midang test la nei lote pawh hi nimin khan neih chhunzawm an ni tih, Communist Party of China official thuchhuah chuan a tarlang. 

Wuhan khuaa party secretary Ma Guoqiang chuan Thawhṭanni thleng khan he khawpuia cheng, mi  maktaduai 11 zinga maktaduai 10.59 chuan test hi an nei tawh tih a sawi. Thawhṭannia an enfiah aṭang hian a hmaa la enkawl loh, he hri kai mi 1,499 finfiahte chu damdawi-inah dah nghal an ni tih a  sawi bawk. 

Ma chuan khawpuia cheng zawng zawngte hi test neih sak vek an tum a, nimin khan an zawh theih a beisei thu a sawi. Wuhan khuaah hian damlote enkawl tur hian ramchhung hmun dang aṭangin medical mi leh sa 20,000 dawn tirh luh an ni tawh a, medical team dang pawh tirh tum leh mek an ni. 

Wuhan City mayor chuan January 24-a New Year Holiday an hman ṭan hma khan Wuhan khua aṭang hian China ramchhung hmun dang leh ram pawn lama zin turin mi maktaduai nga vel an kalchhuak tih a sawi. China chuan Wuhan khua aṭanga kal chhuakte hi an hriselna dinhmunte hriatfiah tumin an awmna leh an kalna chinte a chhui zui mek a ni.  

China chuan Thawhṭanni khan coronavirus vang hian mi 108 an thih belh leh tih a sawi a, he hri leng vanga thi hi mi 1,016 an tling tawh a ni. Thawhṭanni vek khan he hri kai mi 2,478 hmuhchhuah belh an ni bawk a, hri kai finfiah tawh hi mi 42,638 an tling tawh. 

President Xi Jinping chuan Thawhṭanni khan Beijing-a damdawi-inte tlawhin, damlote leh damlo enkawltute a tlawh kual a ni. 

Ningani hian European Union (EU) kaihhruaiin novel corona­virus vangin emergency meeting neih a ni dawn. He meeting-ah hian World Health Organization (WHO)  palaite pawh an tel dawn bawk a ni. 

Hriat theih chinah Europe huam chhungah hian coronavirus kai mi 30 hriat chhuah an ni tawh a, hei vang hian European Commissioner for Crisis Management Janez Lenarcic chuan "Tun hun hi inlungrual taka kan ṭan tlan hun tur chu a ni," a ti. 

Ruahhman lawk anga he meeting hi kalpui theih a nih chuan EU minister-te chuan he natna hri leng mek laka inven leh inenkawl dan chungchang an sawi ho dawn a ni. An mi sawm WHO aṭanga kal turte thurawn pawh inhawng takin an ngaihchan tur thu an tarlang bawk.

EU member ramte hi 27 a ni a, EU-a mipui cheng zat hi maktaduai  447 vel an ni. An ram chhung mite'n he natna hi an kai tam loh nan theihtawpin hma an lak dawn thu EU thuneitute chuan an tarlang.