Jerusalem-a Isua thlan chei ṭha ṭan

Jerusalem-a Isua thlan chu kum 200 hnuah chei ṭhat ṭan a ni. Thlan cheiṭhat a nih hnuhnun ber chu kum 1801 daih tawhah khan a ni.

Kristianten Isua thlan awmna nia an ngaihah hian Church of the Holy Sepulchre (Thlan thianghlim Biak In) a awm a, he biak-in enkawltu kohhran pathumte inkarah inhriatthiam lohna a awm ṭhin avangin a chei ṭhat hna pawh hi hun rei tak thawh theih lohin a awm phah a ni. Mahse Greek Orthodox, Roman Catholic leh Amernian kohhran hotute chuan Biak In chei ṭhat a ngaih tawh zia an hmuhin inremna an nei thei ta a ni.

Thlan siamṭhat hna hi Greece rama mithiam bik pakua-ten an thawk a, an hnathawhna ber chu Isua thlan awmna chunga sak, Edicule cheiṭhat a ni a, kum 1810-a kangmei chhuakin a tihhmelhem hnuah siamṭhat ala ni lo. He hmun hi Isua khenbehna hmun aṭanga hla vak loa awm a ni.

Greek Orthodok, Roman Catholic leh Armenian kohhrante chu he Biak In-ah hian hun hran ṭheuah an inkhawm ṭhin a, mahse thlan thianglim enkawlna lamah chuan mawhphurhna ang khat vek an nei a ni. Kohhran pathumte inkar boruak hi a ṭha lo fo a, kum 2008 khan Greek Orthodox leh Armenian puithiamte chu an intibuai a, mahse nikuma Israel antiquity thuneituten he Biak In hi a him tawk tawh lo tia sawi a, Israel police-ten hun rei vak lo an kharsak hnuah siamṭha tura hma lak an duh tlang ta a ni.

Isua thlan awmna hmun hi la nghet ṭha mah se, tui, hnawng leh bati alh khuin kum tam tak a lo bawh nasat tawh avangin thuam ṭhat a ngai tawh hle a, hei bakah hian a awmna hmun hi lirnghing laka him tura thuam a ngai nia sawi a ni. A chei ṭhatna atan hian a enkawltu kohhran pathumte hian dollar maktaduai 3.3 ṭheuh an thawh a, hei bakah Jordan lal King Abdullah chuan pawisa a thawh bawk. Kohhran hotute chuan a chei ṭhat hna hi thla 8-12 chhung zawh hman beisei a ni thu an sawi a, hemi chhung pawh hian khualzinten an tlawh thei dawn tho a ni.