Democratic candidate turin Clinton-i a tling

US President thlanna neih tura Democratic Party candidate ni turin Hillary Clinton-i chu a tling ta a, hmeichhe zinga president candidate ni thei hmasa ber a ni.

Kum 1789 khan independent thar America president hmasa ber turin George Washington chu thlan tlin a ni a, a hnua hian mi 44-te chuan US president dinhmun hi an chelh zui leh a, an vai hian mipa niin mi ngo 43 an awm.

Clinton-i hian party nominee ni tura delegate neih ngai zat 2,383 aṭangin delegate 1,812 a nei tawh a, mahse superdelegate 571 in an thlawp dawn avangin party nominee a ni thei tawh dawn a ni. Party candidate tur hi July thlaa party convention neih hunah official-a puan a ni chauh ang. Superdelegate-te hi party hruaitute, national convention hunah an thlawp duh la thlang lam thei turte an ni.

Hetihlai hian Bernie Sanders chuan campaign hi a la chhunzawm zel tur thu a sawi a, party candidate nih tuma inchuhna a tawp ta nia thutlukna siam nan chuan a la hma lutuk a ni tiin, superdelegate-te chuan national convention-ah hian an ṭan lam pawh an la thlak thei a ni, a ti. Primary election neihna tur la awmahte chuan theihtawpa an beih zel tur thu a sawi. Sanders hian delegate 1,521 bakah thlawptu superdelegate 48 a nei. Nimin khan state paruk - California, New Jersey, New Mexico, South Dakota leh Montana-ahte primary election hi neih leh a ni.