IS-te an la hlauhawm reng : UN chief

United Nations Ge­neral Secretary Ban Ki-moon chuan Islamic State (IS) firfiakte chu khawvel pum tan an la hlauhawm reng a ni, a ti.

UN Security Council-a report a pekah he thu hi Ban chuan a sawi a, "Iraq leh Syria ramah sipaiten firfiakte lakah beihpui thlakin, ram an lakna kawnga an hmasawnna tur dang thei mah se, UN member ram tam tak chuan IS-te hi an la hlauhawm reng niin an ngai a ni" tiin a sawi.

Thla ruk kalta chhung khan IS hian Bangladesh, Belgium, Egypt, France, Germany, Indonesia, Lebanon, Pakistan, Russian Federation, Turkey leh US-ah pawikhawihna an thlen a, an pawikhawihna thlen vang hian mi 500 chuang thiin, mi za telin hliam an tuar bawk.

Ban chuan, "Kum 2015 November thla­a Paris leh kumin March thlaa Brussels-a pawikhawihna an thlente khan IS-te theihna leh, an la inzarpharh zia pawh a tilang a ni" a ti. National law enforcement agency-te chuan heng pawikhawihna thlengte hi an la chhui zui reng a, Syria-a IS ho luah ram
aṭanga kir leh firfiakte thlen a ni tih pawh an chiang tawh a ni, tiin Ban chuan a sawi.

IS firfiak pawl zawm tur hian ram hrang hrang aṭangin Syria leh Iraq ram pantu an la awm reng a, khawvel ram hrang hrang aṭanga zawmtu hi mi 38,000 zet an tling tawh niin Ban chuan a sawi bawk. "An zinga a tam zawk hi North Africa, Middle East leh Central Asia aṭanga kal an ni" a ti. Europe leh Southeast Asia aṭangin eng emaw zat an kal nia sawi a ni bawk.