WB-in Covid-19 dona atan USD vbc 12 hman remti

World Bank chuan Covid-19 leng mek dona kawnga developing country-te puihna atan US dollar vaibelchhe 12 hman a remti. 

World Bank Board of Executive Directors chuan Covid-19 vaccine leina leh semkualna atan te, test neihna atan leh hri kaite enkawlna atan heng sumte hi pek a remti a ni. He ṭanpuina hi mi tluklehdingawn khat velin an chhawr thei dawn a ni. 

Nakkum June thla thleng atan World Bank chuan Covid-19 leh a kaihhnawih chungchanga developing country-te chhawmdawlna package a siam a, hemi atana sum ruahman hi US dollar tld 160 a tling. He package siam hi ram 111 velin an hlawkpui theih tura duan a ni bawk. 

World Bank group president David Malpass chuan Covid-19 vaccine chu peih fel a nih hunah ram rethei zawkte hnen a thlen ve theih nan leh, Covid-19 hri an dona kawnga hma an sawn theih nan WB chuan theihtawpa hna a thawh mek thu a sawi. 

Johns Hopkins University tarlan danin Thawlehni zan thleng khan khawvel puma Covid-19 hri kai tawh hi  mi maktaduai 38 chuang an awm tawh a, he hri thihpui hi maktaduai khat chuang an ni tawh bawk. 

Thawlehnia World Economic Outlook report tihchhuahah,  Inter­na­tional Monetary Fund (IMF) chuan kum 2020 khawvel economy tlakhniam­na chu 4.4% vel a nih tur thu a sawi. 

IMF Chief Economist Gita Gopi­nath chuan hri leng hian khawvel eco­nomy a khawih chhiat hle thu sawiin, vaccine siam vat a nih loh phei chuan economy lama harsatna lian tham zawk a la thlen theih thu a sawi.