Gaza-ah Israel-in civil mi leh helpawl a thliar lo : OHCHR

United Nations human rights office (OHCHR) chuan Israel-in Gaza Strip a beihnaah civil mi leh helpawl a thliar hrang lo nia an hriat thu sawiin, indonaa dan bawhchhiat loh tur pawh Israel chuan vawi tam tak an bawhchhia nia an hriat thu an sawi.

Israel-in Gaza a beihna vawi ruk, civil mi thi an tamna leh mipui bungraw tam tak tihchhiat a nih ṭum an zirchian hnuah, UN human right office hian Israel chuan heng hmunte an beih dawn hian mi thliar hran, a awm tawka beih leh eng emaw chen hriattir lawk tura indona dan awm chu an bawhchhia nia a lan thu an sawi a ni.

UN high commissioner for human rights Volker Turk chuan Israel in hmun hrang hranga bomb an thlak danah indona dan bawhchhiatna tam tak awm ngeia an hriat thu sawiin, civil mite him nan emaw a nawlpui him nan emawa indonaa tihtur awmte chu Israel hian an ti lo a ni, a ti. Kar liamta khan UN human right office chuan Israel-in mitang pali chhan chhuah nana civil mi a that chu war crime a nih theih thu an sawi a, hemi rual hian Hamas in mipui tamna laia mitang an dah chu indo dan bawhchhiatna a ni thei tho tih an lo sawi tawh bawk.

'Remna a awm theih ka ring tawh lo' - Israel peace activist

Israel peace activist, October 7, 2023-a Hamas-ten Israel an beih ṭuma an man leh, Gaza Strip-a ni 53 zet an hren zui tak, kum 75 mi Ada Sagi chuan a chunga thil thleng aṭang chuan Palestinian leh Israel-te inkara remna la awm tura a lo rinna chu chhe vek tih a sawi.

Hamas-ten an chhuah hnuah Sagi hi a vawi khatna atan BBC chuan interview neihpuiin, remna awm tura a lo rin vena chu a bo tawh tih sawiin, "Hamas hian remna hi an duh loh tih ka hrechiang tawh a ni," a ti. Sagi hian Hamas-ten Gaza-a an hruai hnu hian apartment-ah dahin an veng zui a, chhuah a nih hma khan hospital-ah an hreng zui leh bawk tih a sawi. An thil tawn aṭang chuan khawvelin Juda mite chu a hua nia a ngaih thu a sawi bawk.

Sagi hi kum tam tak chhung chu Israel-Gaza ramri bul, Nir Oz kibbutz-ah a cheng a, Israel leh Palestinian inkara boruak ṭha a awm theihna turin a thawk ṭhin.