NKorea sipaiten ramri an pelh vangin SKorea-in silai hmet puak

North Korea sipaiten Thawhlehni khan ramri an pelh avangin South Korea sipaite chuan warning pek nan silai an hmet puak tih an sawi. Hetia warning shot an neih hnu hian NKorea sipaite hi an ram lamah an kir leh a ni.

NKorea sipaiten ramri an kan hi June thla bikah a ṭum hnihna niin, SKorea Joint Chief of Staff chuan tihpalh thil ve ve nia a hriat thu a sawi. NKorea sipai hi mi 20 aṭanga 30 inkar vel niin, hnathawhna tur hmanraw chi hrang hrang an keng niin a sawi. NKorea hian ramri depah hmalakna an nei reng a, rahpuah bomb kam, kawngpui thar sial leh tank kalkawng danna te an siam ṭhin niin SKorea sipaite chuan an tarlang. Heng hmalakna hi an ram mipuite SKorea lam pem chhuak tur dan nan an ti nia a lan thu JCS chuan a sawi bawk.

SKorea JCS chuan an ṭhenawm ram hian ramriah rahpuah bomb kam turin sipai a tir lut ṭhin tih sawiin, hei hi an inkar a ṭhat loh chhoh vang niin a sawi. JCS chuan ramri bulah rahpuah bomb puak avangin NKorea sipai zingah eng emaw zat hliam an awm tih sawiin, hetiang thil hi vawi tam thleng tawh mah se NKorea chuan ramria rahpuah bomb kam chu a tawpsan phah lo tih a sawi bawk. NKorea hian hetiang hmalakna a neih reng avang hian SKorea nena an inkar chu a fel mai an duh lo tih tilangtu niin, ram pahnih inkar hi a ziaawm mai a rinawm lo. Nikum November thla khan NKorea chuan SKorea nena sipai thawhdunna tur inremna, kum 2018-a an lo siam tawh aṭanga a inhnuhdawh thu sawiin, ramri bulah sipai leh hmanraw tam zawk a chhawp zui nghal a ni.