Mecca biakzina a kal zingah mi 550 thi tawh

Arab thuneitute chuan Muslim hmun thianghlim, Mecca tlawh tura kal zinga mi 550 an thi tawh tih an sawi. Thi zinga a tam zawk chu khaw lum vang a ni tih an sawi tel bawk.

Saudi Arabia-a biakzinnaa kal zinga thi mi 323 chu Egypt mi an ni a, thi zinga mi pakhat tih loh chu khaw lum leh a kaihhnawih vanga boral an ni tih report chuan a tarlang. Jordan mi 60 an thi bawk tih sawiin, ram hrang hrang mi thi zat hian 570 a pel tawh a, mahse Al-Muaisem a ruang dah khawmnaah chuan ruang 550 chiah a awm tih an sawi tel bawk. Mecca-a Grand Mosque-ah Thawhṭanni khan khaw lum zawng hi 51.8 degree celsius a ni tih Saudi national meteorology centre chuan a tarlang.

Egypt foreign ministry chuan biakzina Egypt mi kalve bote zawn hna chu Saudi thuneitute nen an kalpui ve reng tih Thawhlehni khan an puang. Hemi bakah hian Saudi thuneitute chuan khaw lum vanga buai, mi 2,000 vel an enkawl mek tih an tarlang bawk.

Khaw lum vangin Mecca pana kal Muslim-te hian buaina tam tak an tawk a, Saudi thuneitute chuan kumin Haj-ah hian mi maktaduai 1.8 vel Mecca panin an kal tih tarlangin, heng zinga mi maktaduai 1.6 chu rampawn aṭanga rawn kal an ni tih an sawi.

Mecca-a Haj an hman ṭhin hi khawvela sakhaw thila pung khawm tamna ber zinga mi niin, kal khawm an tam tham avang hian khaw lum bakah inpawngnekna thleng leh chetsualna dang thleng vangtein nunna chan an lo awm fo tawh ṭhin a ni.