Lebanon leh Israel aiawhte inbia

Lebanon leh Israel chu hun rei tak chhung sea border chungchanga an buaina neih tawh chinfel dan zawngin nimin khan an inbia. 

Israel energy minister Yuval Steinitz chuan inbiakna neih hma hian Lebanon nena an inbiakna tur hi remna leh muanna siamna tur leh, ram pahnihte inlaichinna siamṭhatna tur lam ni loin, kum 10 chhung zet sea border chungchanga buaina an lo neih tawh chinfelna tur a ni tih a sawi. 

Lebanon-a Hezbollah pawl, kum 2006 aṭanga Israel nena lo indo tawh pawhin he inbiakna neih tur hi remna zawnga inbiakna a nih loh thu a sawi ve bawk. 

Hetih lai hian US secre­tary of state Mike Pompeo chuan ram pahnihten inbiakna neih an remti chu thil chhinchhiah tlak tak a nih thu a sawi a, land border chungchangah pawh inbiakna an la neih leh theih ngei a beisei tih a sawi a ni. 

Nimina Lebanon leh Israel inbiakna hi United Nations peacekeeping force UNIFIL-in a buapui a ni. UNIFIL hi kum 2000-a Lebanon chhim lama Israelin a ram luah a chhuahsan hnua ram pahnih boundary enzuitu a ni.