Armenia-Azerbaijan inbeihnaa thi mi 600 chuang tawh
Nagorno-Karabakh bial inchuha Armenia leh Azerbaijan sipaite inbeihna avanga thi chu mi 600 an tling tawh a, an zingah hian sipai 532 an tel.
Soviet union ram ṭhin pahnihte hi Azerbaijan ram china awm, mahse Armenian tualchhung sipaite thunun mek Nagorno-Karabakh inchuh hian September 27 aṭang khan an inbei thar leh a, kar hnih chuang an inbei chhunzawm tawh a ni.
Ram hrang hrangte'n an inbeihna titawp a, remna zawnga inbiakna nei turin an nawr a, hetihlai hian heng ram pahnihte hian boruak ṭha siamna tura hmalakna bawhchhiaah an inpuh tawn ve ve thung.
Kar liam ta Nilaini khan ram pahnihte hian Moscow-a inbiakna an neih hnuah inkahhai puan an remti a, mahse inremna an siam hnu lawkah an inkap zui leh tho a ni. Russia defence minister Shergei Shoigu chuan nimin khan Armenia leh Azerbaijan defence minister ve ve te chu telephone-a biain, inremna an lo siam tawh chu a taka kengkawh turin a ngen.