Iran-in US sipai hmun a beih vangin US sipai 109-in TBI neih phah

January thlaa Iran-in Iraq-a US sipaite awmna ballistic missile hmanga a kah hnu khan missile puahna avangin US sipai 109-in 'Traumatic Brain Injury (TBI)' an tawrh phah thu Pentagon chuan a tarlang leh.

Pentagon chuan a hmain kha thil thlengah khan US sipai 11-in TBI an tawrh thu a lo sawi tawh a, hemi hnu January thla tawp lam khan US sipai 50-in TBI an neih thu a puan belh leh a ni. Pentagon-in a tarlan tak TBI nei US sipai 109 zinga sipai 76-te chu enkawlna peka an hna ngaia duty tir leh an nih thu tarlan a ni a, sipai 27-te chu German-ah enkawl zui a nih hnuah, chungzinga sipai 21-te chu enkawl tura US-ah phurh leh an ni.

Thla hlui khan Iran chuan Iraq thlanglama awm, Anbar province-a Ain al-Asad airbase leh Erbill base hmuna US sipai awmte chu missile hmanga beih a ni. He thil thlen chhan hi thuthar thehdarhtute chuan January 8-a US-in Iran`s Revolutionary Guard commander Qassem Soleimani an thah vanga phuba lakna niin an tarlang. 

Pentagon-in a tirah Iran beihna vang hian US sipai thi leh hliam an awm loh thu tarlang mah se, a hnuah kha thil thleng vang khan US sipai zingah 'traumatic brain injury' an awm phah thu a tarlang leh hnuhnawh a ni. Iraq sipaite'n Islamic firfiakte an beihna kawnga pui turin US sipaite hi Iran-ah hian 5,000 chuang an awm mek a ni.