Myanmar : Suu Kyi piancham lawmtu mi 22 man

Myanmar rama mipui sorkar a din theih nana beitu, Aung San Suu Kyi chu Nilaini kha kum 79 a tlin champhaphak a ni a, a piancham puala an thlawpna lantirtu mi 22-te chu police-ten an man.

Myanmar khawpui lian ber pakhat, Mandalay police-te chuan Suu Kyi piancham lawmna puala a inchei dan ṭhin anga an sama pangpar thiata an thlalak post-tu, mi 22 te an man niin Eleven Media chuan a tarlang. An mi mante hian Suu Kyi inchei dan anga an inchei bakah, vantlang inkhawmna hmunah mipuite hmin tumin thu an sawi niin an tarlang bawk.

Aung San Suu Kyi hi kum 2021 khan sipai sorkarin mipui sorkar thuneihna an hnehchhuh hnuah khung hran niin, khawlvel ram hruaitu dangte chuan sipai sorkar hnenah Suu Kyi chhuah turin ngen reng mah se awmzia a awm lo a ni. Sipaite hian an hren hnuah thubuai eng emaw zat siamsak tawhin, heng thubuai hrang hrangah hian sipai court chuan thiam loh a chantir a, kum 27 tang turin a chungthu a rel sak tawh bawk. Suu Kyi hi khung hran a nih hnu hian ramdang palai vawikhat chiah hmuh phalsak niin, nikum July thla khan Thailand foreign minister nen an inkawm a ni.

Suu Kyi fapa chuan Nilaini khan a nu chu a ngaihtuah hle tih sawiin, a nu chu a tar ve tawh bakah a hriselna a hniam zel avangin a dinhmun chu a ngaihtuahawm niin a sawi. Sipai sorkarin an khung hran hnu hian Suu Kyi hi mipui hmuhah a inlan tam lo hle a, a hriselna dinhmun diktak pawh hi hriat a har hle.