Russia-North Korea security pact thar siam vangin SKorea-in Ukraine tana ralthuam pek dan ngaihtuah dawn

North Korea tlawhtu, Russia President Valdimir Putin chuan Pyongyang-a a cham chhungin North Korea nen thawhdunna huang zauhna tur inremna an ziak. He inremna an ziah hi cold war zawh hnua ram pahnih inkara inthlunzawmna nghet siam tura inremna an ziah ṭhat ber nia sawi a ni. Hei vang hian NKorea ṭhenawm, South Korea chuan ngaihtuahna thar sengin, Russia nena indo mek, Ukraine hnena ralthuam pek dan tur ngaihtuah a tum.

NKorea sorkar hnuaia awm, Korean Central News Agency chuan Kim Jong-un leh Putin chuan ram pahnih tana thil pawimawh hrang hrang an sawi dun a, ram pahnih inzawmna tinghet lehzual turin hma an la tih a tarlang. An inremna ziahah hian Russia emaw NKorea emaw chuan indona an hmachhawn a nih chuan sipai chakna leh ṭanpui ngaihna laia inpui tura inremna pawh a tel a, mahse he inremna hi UN charter Article 51 zulzuia siam a ni, an ti. Khawvel inrelbawlna kawnga thunei bik an awm lohna atana hmalakna tur leh, defence tihchak nana thawhhona turte chu inremnaah hian ziah tel a ni tih tarlan a ni bawk.

Russia leh NKorea-ten inremna an ziah thar hnuah, South Korea chuan Russia nena indo mek Ukriane hnenah ralthuam pek an ni dawn em tih an ngaihtuah dawn tih an puang. SKorea hian Ukraine-Russia indona thlen hnuah, Ukraine tanpuina leh chhawmdawlna te a lo pe tawh a, mahse ralthuam lam erawh chu a la pe lo thung. SKorea president office chuan an ṭhenawm ram leh Russia inremna ziah thar chu an dem takzet tih sawiin, inremna chuan UN Security Council resolution a bawhchhia a, SKorea leh Russia inkarah a ṭha lo zawngin nghawng a nei thei a ni, a ti.

Inremna hi SKorea himna atan a thil pawi thei a ni tiin, SKorea national security adviser, Chang Ho-jin chuan a sawi a, Russia beihna do let turin Ukraine hnena ralthuam pek chungchang an ngaihtuah dawn tih a tarlang. South Korea vice foreign minister Kim Hong Kyun pawhin an rama Russia palai chu NKorea nena an inremna ziah thar dodal zawnga thusawi turin a duh tih a sawi ve bawk. Nimin khan foreign ministry chuan Russia palai, Goergy Zinoview hi koin, Russia-NKorea security deal ziah thar chungchanga an lungawi loh thu pawh an hrilh nghal a ni.