Kenya : Chhiah tihpun tumna mipuiin an duh lo

Kenya sorkariin an rama chhiah khawn tihpun an tum thu an puan hnuah mipuite chuan rampum huapin lungawi lohna an lantir

Chhiah tihpun tumna avang hian ram chhungah buaina chhuakin, Amnesty International police chuan sorkar thutlukna duh lohna lantirtu mi 105 man an ni tawh tih an tarlang.

Kenya police-te chuan mipui lungawi lo pung khawm hnawh darh nan tear gas, water cannon leh rubber bullets te an hmang a, Kenya khawpui Nairobi-ah mi 200 chuangin hliam an tuar nia tarlan a ni. Bliss Medical Centre, Nairobi-ah mi pakhat chu silaia kah a nih vangin a hliam tuar loin a thi nia tarlan a ni bawk. Ram chhunga pawl hrang hrangte chuan National Police Service chu tharum hmang lo tur leh, hleih nei tak leh dan dik loa Kenya mipuite man tawh lo tura an duh thu an sawi.

Kenya-ah hian Thawhlehni aṭang khan nawrh huaihawt ṭan niin sorkarin chhiah tihpun tuma dan a chhawp chhuah an dodal a, dan siamtute chu he dan thlawp lo tur hian mipuite chuan an ngen. Sorkar hian national medical insurance plan bakah oil leh tuialhtheia chhiah khawn ṭhin chu tihpun a tum a, hei hian thil dang man a nghawng dawn avangin mipuite chuan an duh lo a ni. Mipui lungawi lohna avang hian Kenya sorkar chuan chhangthawpa VAT 16% lak a tumna leh lirtheia kumtin chhiah lak a tumna chu a ṭhulh tih puang mah se, mipuite chuan chhiah tihpun tumna chu a vaiin kaltlangpui lo tura an duh vangin lungawi lohna lantir hi an la chhunzawm zel thung.

Mipuiten nawrh an huaihawt mek karah, Parliament chuan Ningania second reading neihah finance bill hi a pass tho a, kar leh lamah third reading leh final reading hi neih a ni dawn a, a final version hi June 30 hmaa pass hman a ngai dawn a ni.