Hezbollah in rocket 45 hmangin Israel hmar lam a bei

Lebanon helpawl, Iran-in a thlawp Hezbollah chuan Israel hmar lam ramri aṭangin Israel an bei chhunzawm zel a, Ningani khan rocket 45 hmangin Israel military base Zar'it an bei.

Hezbollah chuan Israel sipaiten an pawl hotu, field commander Abbas Ibrahim Hamza Hamada an thah avanga an chhan letna a ni tih an sawi. Hamda hi Israel sipaiten drone hmanga Lebanon chhim lam, Dire kifa an beihnaah a thi a ni.

Israel sipaite hian Hezbollah rocket zinga 25 chu Western Galilee lamah Ningani chawhnu dar 2:30 vel khan kah niin, darkar khat hnuah a dang 20 a hmun ngai bawkah hian kah leh a ni, an ti. Mahse heng rocket-te hian thil pawi engmah thlen loin, ram ruakah vek an tla niin an sawi bawk. Israel Defence Force-ten drone hmanga an beihnaa thi, Hamada chu Israel mite beihnaah vawi tam tak inhnamhnawih tawh niin an tarlang. IDF in Lebabon chhim lama Rihan an beihnaah, an fighter jet chuan Hezbollah surface-to-air missile a kap chhe bawk tih an sawi.