Israel-in Gaza a beihnaah mi 39 an thi

Israel chuan Gaza Strip-a beihna chu chhunzawm zelin, Palestinian leh hospital official-te chuan kar liamta Inrinni khan Israel sipaite beihna avangin mi 39 nunna chan an awm belh tih an tarlang.

Gaza City-a al-Ahli hospital director, Fadel Naem chuan ruang 30 chuang zet an damdawi-inah phurh luh an ni tih Associated Press a hrilh. Palestinian Civil Defense chuan chhawmdawl hna thawktu, an mi leh sate chu Shati refugee camp-ah damchhuak zawngin an hman hlel hle tih sawiin, Gaza chhak lama Israel-in building a kah fuh aṭangin ruang an phawrh chhuak nual tih an tarlang tel bawk.

Israel chuan Inrinni khan an indo thlawhtheihna hmangin Gaza-a Hamas firfiakte tawmbuk pahnih an kap tih an tarlang ve bawk. Israel hian Gaza laili leh chhim lamah beihpui an la thlak chhunzawm zel a, chhim lam khawpui Rafah-a beihna pawh tawpsan mai a tum lo. Israel hian Inrinni vek khan Lebanon chhak lama Bekaa Valley chu kap bawkin Hamas thlawptu, al-Jamaa al-Islamiya helpawl mi leh sa an kap hlum bawk a ni.

United Nation chuan Gaza-a hmun englai mah him a awm lo tiin, mihring dam khawchhuah nana pawimawh tak tak- eitur, tui leh damdawi an tlachham niin a tarlang.

Israel sipaiten Palestinian mi hliam tuar, an lirthei hmaa phuarbeta khawlaia an tlankualpui lai video darh chu Israel chuan an chhuichiang dawn tih an sawi. Israel sipai chuan an mi phuarbeh chu an mi zawn lai a nih thu leh, Jenin hmuna Palestinian leh Israel inkahnaa hliam tuar a nih thu sawiin Red Crescent ambulance lama hruai a ni tih an sawi bawk. Israel sipai chuan video darha sipaite chet dan chu sipai inkaihhruaina palzutna a ni tih an sawi.