UN-in NKorea a hrekna Russia-in a thlawp a ngai : UN Secretary-General

United Nations Secretary-General, Antonio Guterres chuan tunhnaia inremna ziak thar, Russia leh North Korea inkarah inlaichinna ṭha tak awm mah se UN in NKorea hrek tura thutlukna a lo siam tawh chu Russia chuan a thlawp a ngai tih a sawi.

UN chuan nuclear leh ballistic missile program avangin kum 2006 aṭang khan NKorea lakah hian hrekna a lo siam tawh a ni.

UN Secretary General chuan khawvel ram dangten NKorea chu inlaichinna neihpui mah se UN-in NKorea laka hrekna a lo siam tawh chu eng ram pawhin an zawm a ngai a ni tiin, Russi Federation pawh an bang thei bik lo tih a sawi. Guterres thusawi chungchangah hian Russia chuan sawi engmah a la nei lo thung.

US chuan NKorea chu Ukraine beih nana Russia ralthuam pe ṭhinah a puh a, UN Security Council chu US, France, Britain, South Korea leh Japan ngenna vangin June 28, Zirtawpni hian hemi chungchang sawi ho tur hian an ṭhukhawm dawn a ni.

UNSC-ah hian NKorea chungchanga hmalak dan turah ngaihdan a phir ṭhin hle a, Russia leh China chuan hrekna siam belh chuan awmzia a nei lo tiin kum 2019 khan NKorea hrekna ṭhenkhat chu hliksak an lo dil tawh a ni. US leh khawthlang ram dangte chuan NKorea hrekna siam belh hi an duhdan a ni thung a, kum 2022 khan UN chu hrekna siam beih turin a lo ngen tawh thung.