Rafah-a beihpui thlak zawhfel a ni dawn tawh : Israel PM

Israel prime minister Benjamin Netanyahu chuan Gaza khawpui chhim lam, Rafah-a Hamas laka beihpui an thlak chu zawhfel a ni ṭep tawh tih Pathianni khan a sawi. Hemi rual hian beihpui thlak chu zo dawn tawh mah se indona erawh a tawp dawn tihna a ni lo tih a sawi tel bawk.

Prime Minister Netanyahu chuan Israel hmar lama Lebanon nena an ramriah sipai dah belh a ni dawn tih a sawi a, hei hi Israel venhimna tur a nih bakah, Israel mi an in leh lo chhuahsana raltlante hruai haw an nih theihna tur a ni bawk tih a sawi. Lebanon nena an ramriah hian inkahna a chhuah fo avangin Israel mi tam tak chuan an chenna hmun an chhuahsan a, heng an mi leh sate venhim nan hian Rafah-a beihpui thlak tura an sipai tirh luhte chu beihpui thlak zawhfel a nih hnuah, Lebanon nena an ramria venhim hna kalpui turin Israel chuan dah a tum.

Netanyahu chuan Gaza-a inkahhai puan a nih theih nan inremna chungchang sawiin, indo tihtawpna tur inremna chu pawm an tum lo tih sawi nawn leh mah se mitang ṭhenkhat emaw an zavai emawa chhuah an nih dawn chuan inkahhai lailawk nei tura inbeik an inpeih tih a sawi bawk. "Kan tum ber chu mitang chhan chhuah leh Gaza aṭanga Hamas nuai bo a ni," Israel PM chuan a ti. Hamas kuta la tang mek, mi 120 chu thi emaw, dam emawa an hruai kir leh vek hma chuan Gaza chu chhuahsan mai an tum lo tih a sawi.

Israel hian Gaza a beihna hi a la chhunzawm zel a, Pathianni khan Hamas awpna hnuaia awm, Gaza hmar lam bomb hmangin a bei a, thi leh hliam 50 chuang an awm nia tarlang a ni. Lebanon-a inkhuar, Hezbollah chuan Israel hmar lam a kap ve reng bawk a, ram pahnih inkar hi a ṭha lo hle a, indo mai thei dinhmunah an ding reng a ni. Heng a nih avang hian Israel chuan sipai tam zawk Israel hmar lamah hian a dah belh a tum a ni.