Russia : Dagestan-ah ralthuam keng misual rualin mi 19 kap hlum

Russia chhim lama awm, Republic of Dagestan-ah Pathianni khan ralthuam keng misualte chuan khaw pahnihah Orthodox biak-in, Synagogue leh police post an bei a, police officer 15 leh civil mi pali kah hlum an ni tih Russia investigative committee chuan a tarlang.

Caspian tuipui kam khaw pakhat, Derbent khaw chhunga Synagogue leh biak-in chu ralthuam keng misualin an kap a, hemi hnu lawk hian Dagestan khawpui, Makhachkala-ah biak-in leh traffic police post chu silai hmanga kah a ni leh bawk tih Dagestan Interior Ministry chuan a tarlang. Russia National Anti-Terrorist Committee chuan inbeihna thleng chu firfiakte chetna a ni tiin an sawi.

Dagestan Governor Sergei Melikov chuan nimin khan inbeihna hi a thleng ngei tih sawiin, Dagestan leh Russia rampum tan ni lungchhiatthlak tak a nih thu leh, an inpumkhatna tihchhiat tumna a nih thu a sawi bawk. Dagestan chuan misual beihna vanga nunna chante hi ni thum chhung a sûn dawn tih a puang.

Khawpui pahniha inbeihna thleng hi eng helpawl mahin an tih a nih thu an la sawi lo a, a titute chhuizui hna hi kalpui mek a la ni. Governor Melikov chuan tun dinhmunah chuan Dagestan chhungah venhimna ṭha taka kenkawh a nih tih a sawi a, pawikhawihnaa inhnamhnawih zawng zawng man kim an nih hma chu chhuizui hna kalpui zel a ni dawn, a ti. Melikov chuan he inbeihnaah hian ramdang aṭanga inrawlh an awm thei niin sawi bawk.

Russia-ah hian ralthuam keng misualin mipui pung khawm an beih hi kumina thlen ṭum khatna a ni lo a, March thla khan Moscow-a concert hall-a mipui pung khawm chu misualin silai hmanga beiin, mi 145 an thi a ni. He pawikhawihna hi Islamic State hnuaia helpawl pakhat chuan an tih a nih thu an sawi a ni.