Mecca-a Haj hmanga kal mi 1,300 chuang an thi tawh

Saudi Arabia chuan Mecca khawpuia Muslim hun pawimawh, Hajj hmanga biakzina kal zinga mi 1,300 chuang chu khaw lum lutuk avangin an thi tawh tih a sawi.

Saudi Press Agency chuan hajj hmang tura kal zinga mi 1,301 an tih tawh a, hetih lai hian an zinga 83% chu phalna nei loa kal leh in register lo an ni tih sawiin, ni sa tak hnuaiah invenna ṭha tak nei loa kawng thui tak tak zawhte an ni, a ti.

Biakzinaa kal thite hi ram 10 chuang a mite anni, an zinga a tam ber chu Egypt mi an ni a, mi 658 an tling a, mahse 630 chu in register lo an ni. Mecca khawpui lum lam hi 51.8 degree Celsius a tling niin Saudi Arabia national meteorological centre chuan a tarlang.

Saudi health minister, Fahd Al-Jalajel chuan kumina hajj atana an inbuatsaihna chu a hlawhtling hle niin a sawi a, healh sytem pawh ṭha taka duan niin, mi nuai 4.65 te special treatment pek an ni a, an zingah hian hajj-a tel tura phalna nei lo mi nuai 1.41 an tel a ni, a ti. Kumina hajj hmang tura Mecca khawpuia kal khawm hi mi maktaduai 1.8 an tling a ni.

Hajj permit hi ram hrang hrangah quota pek niin, hei hi mimalah an sem leh a ni. Hetih lai hian hajj hi Islam pillar panga zinga, Muslim mi hrisel ṭha pangngaiin an dam chhunga pakhat tal an hlen chhuah tur zingah a tel avangin permit nei lo pawhin an theih dan kawngin tel hram dan an ngaihtuah ṭhin a, man leh thawn kir pawh huama kal tam tak an awm fo ṭhin.