UN hotuin Pakistan a tlawh dawn

United Nations (UN) Secre­tary-General Antonio Guterres chuan Pathianni hian Pakistan-ah a zin dawn a, a cham chhung hian Sikh sakhaw dintu Guru Nanak Dev thlan, Gurudwara Darbar Sahib tlawh a tum. 

UN hotu hian Pakistan prime minister Imran Khan leh foreign minister Shah Mahmood Qureshi te kawmin, Pakistan ram hmasawnna tur leh climate change chungchang  sawipui a tum. Pakistan sorkar leh UN Refugee Agency (UNHCR) in an buatsaih, February 17-a International Conference on 40 Years of Hosting Afghan Refugees in Pakistan neih turah Guterres hian thu a sawi dawn bawk a ni. 

February 18-ah Lahore-ah zirlaite a kawm dawn a, polio vaccination campaign hawnnaah a telpui bawk ang. Hemi hnu hian Gurudwara Kartarpur Sahib tlawhin, February 19-ah New York-ah a kir leh ang.