ICC-in Russia hotu pahnih man phalna a tichhuak

International Criminal Court chuan Ukraine an beihnaa civil mi an beih avangin Russia defence minister hlui, Sergei Shoigu leh military chief of staff Gen. Valery Gerasimov te manna tur thupek a tichhuak. Defence minister hlui Shoigu hian tunah chuan Russia Security Council-ah secretary hna a chelh mek a ni.

ICC chuan Shoigu leh Gerasimov-te hian indonaa dan bawhchhiat loh tur an bawhchhiat bakah mihring nihna zah loin pawi an khawih a ni, a ti. Warrant a tihchhuah chhan hi October 10, 2022 aṭanga March 9, 2023 inkara Russia sipaiten missile hmanga Ukraine eng pek chhuahna ruhrel an kah vang a ni tih an sawi. Hemi hun chhung hian Russia chuan Ukraine power plant leh sub-station vawi tam tak a kap tih ICC chuan a tarlang bawk.

Russia hi ICC-ah hian a tel loh bakah ICC thuneihna pawmpui loin thiam loh a chantirte te pawh court-ah a hlan duh ṭhin lo a, hei vang hian Russia hotu pahnih manna tur warrant awm mah se man an mai a rinawm loh thung. Kum 2023 khan ICC vek hian Russia president Vladimir Putin chu Ukraine a naupang rukbonaa inhnamhawihna neia a ngaih vangin manna tur thupek a lo chhuah tawh bawk a ni.