Kenya : Chhiah tihpun duh loa nuar zinga mi 5 kap hlum

Kenya ramah chhiah tihpunna tur dan Parliament-ah put luh a nih vangin kar liamta aṭang khan nawrh huaihawt a ni a, mipui lungawi lote chuan khawlaiah an lungawi lohna an lantir chhunzawm zel. Thawhlehni khan mipui lungawi lo, Parliament hungchhungah luh tumte chu police chuan kapin mi panga an thi a, mi 31 in hliam an tuar.

Kenya-a dan siamtuten chhiah tihpun an tumna hi mipuite chuan an thlawp lo hle a, sorkar chu kaltlangpui lo turin an nawr a ni. Kenya president William Ruto chuan nawrh huaihawttute chu inbiakna neihpui a inpeih thu sawi mah se boruak hian ziaawm lam a la pan thei lo.

Amnesty International, Kenya executive director Irungu Houghton chuan Kenya khawpui Nairobi-ah National Police Service chuan silai an chelek ṭan niin a sawi. Mipui zinga hliam tuar enkawl tura kal damdawi lam thiamte chu tibuaitu awm loa khawpui chhung hmun hrang hrang rang taka kal theih an mamawh tih a sawi bawk. Amnesty international hian kar liam ta chhung khan lungawi lohna lantirtu zinga mi 200 chuang chuan hliam an tuar niin an tarlang bawk.

Kenya sorkar hian chhiah tihpun a tumna ṭhenkhatah mipuite nawrh vangin chhiah tipung lo turin thutlukna siam leh mah se chhiah ṭhenkhat erawh tihpun a la tum thung. Hemi a tih chhan chu sorkar sum bawma pawisa chhunluh tur atan leh ramdang hnen aṭanga sum puk tihtlem nan a ni tih an tarlang. Kenya Parliament in chhiah tipunna tur bill a pawm tak avangin venhimna tikhauh lehzual a ni.

United Nations secretary general Antonio Guterres chuan Kenya rama thil thleng chuan a ti hrehawm hle tih sawiin, Kenya thuneitute lam pawh an theih anga inbengdai tura ngeiin, nawrh huaihawtte pawh boruak muanawm tak hnuaia an lungawi lohnate lantir turin a ngen a ni.