Iran President thlan turah candidate 6 an awm

May thlaa helicopter chesuala Iran president Ebrahim Raisi a thih avangin a thlaktu tur chu naktuk hian thlan a ni dawn a, President thar thlanna turah hian candidate paruk awmin, an zinga panga chu conservative an ni a, reformist pakhat a awm bawk.

President chuh tuma hming pe lut hi 80 vel an awm a, heng atang hian Guardian Council chuan mi parukte hi a pawm a ni. Candidate atana pawmte chu - kum 62 mi, Parliament speaker Mohammad Bhagher Ghalibaf, kum 53 mi ultraconservative medical doctor Amir-Hossein Ghazizadeh-Hashemi, kum 58 mi nuclear negotiator hlui Saeed Jalili, kum 69 mi leh reformist awm chhun Massoud Pezeshkian, kum 64 mi leh cleric awmchhun Mostafa Pourmohammadi leh kum 58 mi, Tehran mayor Alireza Zakani te an ni.

Iran supreme leader, Ayatollah Ali Khamenei hi kum 85 a nih tawh avangin ram inrelbawlna pawh President thar kutah hian a innghat lian tawh hlein a rinawm. Candidate zinga pangate hi Khameinei thlawptu ṭha tak an ni a, campaign lai leh TV debate-ah pawh political freedom chungchang pawh an pehhel zel a, hetih lai hian reformist awmchhun Pezeshkian chuan social freedom leh women rights chungchang a aupui nasa hle thung. Khameinei hian langsar takin candidate thlawp bik a nei lo a, mahse Thawhlehnia ram mipuite tana thuchah a sawiah, "America duhsakna tel loa engmah ti thei lo tura anga inngai chuan ram hi a enkawl ṭha thei lo ang," tiin a sawi.

Candidate zingah vote tla aṭanga 50% hmu pha an awm loh chuan inthlan thawh hnihna neih a ngai dawn a, vote hmu sang pahnihten inthlan thawh hnihna hi an hmachhawn leh dawn a ni.