UN-in blacklist aṭangin Saudia kaihhruai pawl a paih

United Nations chuan Yemen rama sorkar laka helte laka beihpui thlak mektu, Saudia Arabia kaihhruai ṭangrual pawl chu blacklist aṭangin a paih. Hei hi mi tam takin an sawisel zui a ni.

UN thupuangtu Stephane Dujarric chuan thutawp siam a la ni lo tih sawiin, August thlaa ennawn a nih hunah final list hi tihchhuah a ni dawn tih a sawi.

Hetihlai hian Human Rights Watch leh Amnesty International chuan UN thutlukna siam chungchangah Secretary General Ban Ki-moon chu sawiselin, Saudi ram ṭan leh, UN zahawmna tihchhiaah an puh.

Saudi kaihhruai ṭangrual ramah hian Arab leh muslim ram pakua an tel a, US leh UK in an thlawp bawk. Kum 2015 aṭang khan Yemen sorkar paihthla a, an ram khawpui Sanaa thununtu, Houthis helpawl lakah beihpui an thlak ṭan a ni. Saudi kaihhruai ramten beihpui an thlak hnu hian mi 6,200 zet an thi tawh a, an zinga a zahve chu civil mi a ni. Mi maktaduai 2.8 chu himna zawngin an tlanchhe tawh bawk.

UN hian kar kalta Ningani-a annual report a tihchhuahah Yemen ram tualchhung indona thleng avanga nikuma naupang thi, 795 ziga 60% ah Saudi leh a thurualpui ramte chu mawhphurhtuah alo puh tawh a, mahse hei hi Saudi Arabia chuan thu dik lo a nih thu sawiin, report chu siamṭha turin a nawr a ni. Saudi Ambassador Abdullah al-Mouallimi chuan naupang thihna thleng chungchanga
ṭangrual pawlte puh an ni chu thu dik lo a nih thu sawiin, Thawh-
ṭanni khan Ban hnenah complaint a thehlut a ni. Saudi lamin na taka an sawisel hnuah blacklist aṭang hian paih an ni leh a, hei vang hian human rights pawlte chuan Saudi ram nawrna vanga thlak danglamah an puh a ni.

Dujarric chuan blacklist
aṭanga paih tura ngenna hi Ban chuan a pawm a, mahse August thlaa UNSC-in report a enfiah leh hmain thil awmdan dik tak sawipui turin ṭangrual pawl aiawh chu New York-ah kal turin a sawm. List aṭanga paih lailawk ni mah se, hei hi thu tawp a la ni lo a ni, a ti. Mahse Saudi Ambassador chuan thu delhkilh engmah awm loin list aṭanga paih an nih thu leh, he thutlukna hi thlak danglam leh theih a nih tawh loh thu a sawi thung.