Mediterranean-a chetsualnaah 10,000 an thi tawh
United Nations chuan Meditterean tuipui kaltlanga Europe-a pem luh tum, tuipuia chetsualna thleng vanga thi chu kum 2014 aṭang khan mi 10,000 an tling tawh niin a sawi.
UN refugee agency chuan kuminah pawh tuipuia chetsualna hi a thleng ngun tawh hle tih sawiin, January thla aṭang khan lawng chetsualna thlenga thi hi mi 2,814 an tling tawh a ni. Euorpean Commission vice-president Frans Timmermans chuan mi tam takin nunna an chan fo chu veng dan ngaihtuaha theihtawp chhuah a ngai a ni, a ti.
EU in rawtna thar a siamah chuan Europa rama pemluh tuma kal tam tak awmna ram - Ethiopia, Niger, Nigeria, Mali leh Senegal bakah Jordan leh Lebanon-a private investment chu dollar maktaduai 68-a tihpun te a tel a ni. Hei bakah hian European Commission chuan hna thiam bik neite tana dan ang taka Europe ram an pemluh phalsakna tur ruahmanna, blue card system siam a tum bawk.
Kum 2015 chhung khan Europe ram hrang hrangah hian raltlan leh pem lut mi maktaduai khat chuang zet an awm a, an zinga a tam zawk hi Syria leh Middle East-a tualchhung indona thleng vanga tlanchhia an ni. Kuminah bik pawh May thla tawp thleng khan raltlan hi mi 204,000 an awm tawh a ni.