Kenya sorkarin chhiah tihsanna tur a sut

Kenya sorkarin chhiah lak tihsan a tum avanga hun eng emaw chen mipuiten nawrh an huaihawt hnuah, president Willium Ruto chuan chhiat tihsanna bill chu sut a ni tih a puang.

Chhiah tihsan tumna duh loa mipuite nawrh huaihawtnaa buaina chhuak vangin mi 20 chuangin nunna an chan tawh a ni. A tir lamah chuan boruak ṭha tak hnuaiah bill duh lohna hi an lantir a, mahse Thawhlehnia Parliament-a pass a nih hnuah, Parliament kawta mipui lungawi lo pungkhawm leh police-te nasa taka innawr buaiin, police-te hian pung khawmte lamah silaite an hmetpuak hial a ni. Mipui lungawi lote hian Parliament building luhchilhin, bungruate an suasuam bakah hmun ṭhenkhat an hal bawk. Ceremonial mace pawh ruk bo a ni. Mipui lungawi lo leh police-te inkara buaina chhuakah hian mi 22 in nunna an chan niin Kenya National Commission on Human Rights (KNHRC) chuan a tarlang.

Buaina a chhuah hnuah President Ruto chuan, " Ka tlawm e, 2024 finance bill hi ka hming ka ziah hnan dawn lo a, sut nghal a ni ang," tiin a puang a ni. President hian chhiah lak tihpunna tur ṭhenkhat chu kar hmasa khan a lo paih ṭhen tawh bawk.

President Ruto chuan sorkar sum hmuh tihpunna tura chhiah tihsanna tur bill sut a nih chuan, loneitu, zirtirtu leh midangte tihhmasawnna tura progamme kalpuina tur fund lamah harsatna a awm tur thu a hmain a lo sawi tawh a ni. Mahse mipuite nawrna avang bill hi a sut ta a, hei vang hian an ramin sum lama harsatna a tawh mek te, inrenchemna kalpui a ngaih chungchangte pawh kimchang taka ṭhalaite a sawipui tur thu a sawi.

Chhiah tihsanna bill sut a nih thu President-in a sawi hnuah pawh social media lamah President chenna in bulah lungawi lohna kawng zawh tum a nih thu an la sawi zui vangin, venhimna tikhauhin police pawh ṭhahnem tak duty tir an ni. Mi ṭhenkhat chuan President hi bang turin an phut zui bawk.