Hong Kong school naupangte anthem sak dan duh khawp lo

Hong Kong official-te chuan school naupang ṭhenkhatin Chinese national anthem chu an sa zawi lutuk tiin, an zirtirtute hnenah inringtawk tak leh ring taka an sak theihna atana pui turin an hriattir.

Mi ṭhenkhatin China-in Hong Kong-a thu a neih dan duh lo a, pro-democracy movement an kalpui avangin kum 2020 aṭangin Hong Kong-ah hian China ram hmangaihna inzirtirna hi uar zawkin an kalpui a ni.

Official-te chuan Hong Kong and Macau Lutheran Church Primary School leh, Yan Chai Hospital Lim Por Yen Secondary School zirlaiten Chinese national anthem an sak dan chu a zawiin a nem lutuk an ti a, zirlaite hian a rualin ring taka national anthem sak chu tihṭhana an neihna turin zirtirtuten an pui tur a ni, an ti.

City education bureau-in primary leh secondary school-te endik a, staff leh nu leh pate interview-te a neihpui hnua report a tih chhuahah hemi chungchang hi tarlan a ni. School an endik zinga parukte chu ram leh hnam hmangaihna chungchang an zirtirnaah ṭan la zual tura tih an ni bawk. School ṭhenkhatin an zirlaite mainland China-a an zinpui chu fakin, hei vang hian zirlaite chuan inchhuang leh inringtawkin national flag pawh an vai ngam a ni, tiin a tarlang.