Bolivia President paihthlak tumtu sipai hotu man

Bolivia police-te chuan an ram president Luis Arce paihthlak tuma La Paz-a presidential palace luhchilhtu, sipai hel hotu Gen Juan José Zúñiga an man.

Nilaini khan sipai tam tham takte chuan an motor nena sorkar building pawimawh tak tak awmna, Murillo Square an luhchilh a, sipai motor pakhat chuan presidential palace luhna gate pui ber chu su chhiain, sipaite hi building chhungah an lut zui a ni. Mahse President Ace thlawptu mi tam tak chu Square-ah hian an pungkhawm zui a, an ram flag-te vaiin an hnam hla te an sa a, hemi hnu hian sipaite hi an inhnukdawk leh ta a ni.

Sipai helte hi Gen Juan José Zúñiga chuan kaihruaiin, an ram demcoracy chu siamṭhat a duh tih a sawi a, President Arce chu zah hle mah se sorkar chu thlak a ngaih thu a puang zui bawk. Mahse a kaihhruai sipaite an inhnuhdawh hnuah police-ten an man zui ta a ni.

Attorney general chuan Juan José Zúñiga hi thubuai siamsakin chhui zui a ni dawn tih a puang nghal a ni. Gen Zúñiga bakah hian Bolivian Navy hotu, Vice-Adm Juan Arnez Salvador pawh man a ni bawk.

Bolivia rama thil thleng hi Latin America ram leh pawl hrang hrang chuan an dem thu sawiin, Gen Zúñiga kaihhruai sipaite chet dan chu democracy beihna lian tak a ni, an ti. US pawhin boruak ṭha tak a awm chhoh zel a beisei tih sawiin, thil awmdan chu a thlithlai zui reng dawn tih a sawi.