Tel Aviv-ah Israel mi pali kaphlum

Israel khawpui, Tel Aviv-ah Nilaini zan khan Palestinian mi pahnihin open-air shopping area-ah silai an hmetpuak a, mi pali an kahhlum bakah mi dang paruk an kap hliam.

Israel Defence ministry chuan pawikhawihna thlenna hi Sarona Market-a hmun pahnihah a nih thu an sawi. Police-te chuan silai hmetpuaktute hi West Bank bula Palestinian thingtlang khua, Yatta khaw mi an nih thu an sawi. An pahnih hian man an ni tawh a, pakhat zawk chu kahhliam a nih avangin zai nghal a ni.

Nikum chhung khan Israel mi zingah Palestinian kut tuar an pung chho hle a, silai-a kah, chemte-a vih leh motor-a sutte an tawk fo a ni. Mahse tun hnaiah Israel mite chunga pawikhawihna thleng hi a ziaawm chho deuh a ni.

Tel Aviv-a pawikhawihna thlen hun hi Nilaini zan dar 9:30 vel a ni a, Prime Minister Benjamin Netanyahu chuan pawikhawihna thlenna hmun hi a tlawh nghal a ni.

Police thupuangtu, Luba Samri chuan Palestinian mi pahnih, Yatta khaw mite hian Sarona Market-a cafe pawn lama ṭhutnaa ṭhute chu an pawng kah niin a sawi. Silai hmehpuah a nih hnu hian mi tam tak chu hlauin restaurant chhungah hian an tlan lut a ni. Heng mi pahnihte hian briefcase kengin, ei tur te an order a, a hnuah an ṭhutna aṭang chuan thoin an silai hi an pawng kah ta a ni. Silai an hmehpuah lai hian eng thu mah an sawi lo niin Sarmi chuan a sawi.

Security guard duty chuan pakhat zawk hi manin, police-ten a la nghal a, pakhat dang hi cinema complex lam pana tlanchhiain a silai hi a hmetpuak chhunzawm a ni. Mahse security guard-ten an kap fuh a, hliam na tak a tuar a ni.

Nilaini zan vek khan PM Netanyahu chuan defence lam hotute chu military headquarters-ah emergency meeting a neihpui nghal. Military headquarters hi pawikhawihna thlenna hmun aṭanga hla lo tea awm a ni. PM hian he thil thleng avang hian security cabinet meeting pawh koh nghal a tum a, hma lak dan turte an sawiho ang.

Samri chuan Tel Aviv-a mipui punkhawm tamna hmunahte chuan police tam zawk duty tir an ni dawn tih a sawi a, Tel Aviv municpality pawhin khawpui chhunga security guard a dah zat chu a tihpun tur thu leh, a bikin kingdergarten leh school bulah te dah belh an ni dawn tih a puang.

Kumin January 29 khan Tel Aviv khawpuiah vek hian Arab Israeli Nashat Milhem chuan bar-ah silai hmetpuakin, Israel mi pahnih a kaphlum a, a tlanchhe zui nghal a ni. Mahse police-te chuan theih≠tawpa chhui zui nghalin, ni eng emaw zat hnuah pawikhawihtu hi an kaphlum ve leh a ni.